مشاكل زوجية من واقع الحياة متسمعش كلام ابوك

مشاكل زوجية من واقع الحياة متسمعش كلام ابوك

هند جمال
جالي المكتب مجموعه من الناس
منهم راجل حوالي 30 سنة
وزوجته حوالي 25 سنة
والده ووالدها ووالدتها وأخوها موجودين
خير يا جماعه 
قالوا طلاق
بقالكم قد ايه متجوزين؟
5 سنين
معاكم أطفال؟ 
طفل واحد 
طيب اقعدوا كده واستهدوا بالله
والدتها قالت الموضوع خلصان
قلت بعد إذنكم
أسمع للطرفين بس
اتكلم يا أستاذ
قال الزوج " أنا جاي أنفذ اللي هم عايزينه"
قلت له لأ يا أستاذ،  مفيش حاجة اسمها كده
يعني انت خلصت كل اللي مراتك طلبته منك،  وجاي تنفذ لها ده كمان؟
لو انت بتنفذ اللي هي عايزاه ماكنتوش وصلتوا لمكتبي
قال المهم النتيجة،  هي عايزة تتطلق،  وأنا مش هعيش معاها غصب عنها،  أنا بشتغل 15 ساعه ف اليوم، عشان أعيش زي الناس
مش كل يومين تقول لي طلقني
الزوجة قاطعته
وإيه السبب؟ ماتبصش لآخر كلمة وتسيب اللي قبلها
بتقول لك طلقني وخلاص؟
قالت لي
يا أستاذ أنا هحتاج ايه من جوزي
غير انه يعيشني مستورة
ويبقى حنين عليا؟
رديت عليها وقلت لها ظروف البلد كلها بقت صعبة
وأكيد هو لو معاه مش هيقصر
وموضوع الحنية ده أكيد الدنيا واخداه
راجل بيشتغل تلتين يومه فأكيد مش قادر يوصل لك الحنية
ردت عليا
مش قادر يوصل الحنية؟ 
هي فين أصلاً عشان يوصلها؟
ده بيحن على أي حد غيري أنا وابنه
أنا مابعرفهوش وهو ف الشارع،  ده بيبقى بني آدم تاني
يا أستاذ جوزي سواق تاكسي
كان بيشتغل ف السياحه،  ولما الحال وقف جمع فلوسه كلها ودفع مقدمة لتاكسي وقال استحملي
 معايا 3 سنين لغاية ما أسدد الاقساط 
استحملت معاه 
كنت بستلف من أمي اللي قاعده دي عشان أكشف على ابني لو عيان
كان بيجيب فلوسه كلها آخر اليوم يديها لأبوه بحجة الجمعيات عشان يسدد الاقساط وأنا آخد
 مصروفي من أبوه بالذل
وعديت الأيام عشان الاقساط تخلص
وكان آخر قسط الشهر اللي فات
قلت لها كويس الحمد لله 
دي حاجه كويسة،  عربيته بقت بتاعته وهيقدر يوسع عليكم
بصت لي والدتها وقالت لي ده لو بيفهم 
بص لها الزوج والدنيا اتوترت
 قلت له أومال ايه اللي حصل يا استاذ؟
قال لي دفعت مقدمة عربية تانية
قلت له وتقعد 3 سنين تاني تدفع ف جمعيات؟
قال لي أنا عايز أرتاح بعدين
قلت له وانت مرتاح دلوقتي؟
ومراتك؟
وابنك؟
يا بني مفيش أصعب من إن زوجة تاخد مصروفها من حد غير زوجها
أنا عندي ليك حل
قال لي قول
قلت له تبيع العربية الجديدة لوالدك بأقساطها
وهو يشوف حد يشغلها ويسد أقساطها
قالت الزوجة عرضت عليه كده وهو رفض
قلت له ليه؟ 
قال مش هخليها تمشي كلامها عليا
قلت له انت ف ايدك علبة سجاير بأكتر من عشرين جنيه
يعني سجايرك لو بتشرب علبة واحدة 
600 جنيه ف الشهر
لو اديتهم لمراتك مبلغ جانبي ف البيت عشان الطواريء 
الزوجة قالت لي يا أستاذ مش هيقتنع إلا لو أبوه هو اللي قال له 
وبعد شد وجذب وخناق 
للأسف تم الطلاق
__________________________________________
ماتجيش ع اللي بيحبك قوي
عشان مايتحولش حبه لك لعبء 
ولا انت هترتاح ولا هو هيرتاح
___________________________________________
 منقوول
  للعظة اى واحد بيسمع كلام اهلة بيعرض زوجتة لاحساس من اصعب مايكون اسوء شئ سيطرة
 الاباء على ابنائهم بتحسس زوجتك انها متجوزاك ومتجوزة امك وابوك واخواتك معاك هلرسولك
 الكؤيم وصاك بكدة وفى الاخر بتكون الضحية الاولاد

ما رأيك؟

free hit counter code